Old school Easter eggs.
K.Kallol 2014

মুখ্য পৃষ্ঠা

Ar

• মিছ ওর্ল্ড ঐশ্বর্য ৰায় •
..............................................

(উছর্গা : বিশ্বৰ সগ্ নির্যাতিতা মহিলাৰ
হাতত
যেগুলান দুর্ভোগেৰ বলি হৈল খালী নাৰী হোআৰ জৈন্যে)

পৃথিবীৰ সবথাকিয়া
সুন্দৰ চোঁখদুইটাৰে
তুই ঐশ্বর্য ৰায়

চেংৰা ছাওয়াৰ বেৰাত ঝুলিয়া থাকা তোৰ পোষ্টাৰ
ফটোজেনিক তোৰ চেহেৰাৰ ঐ নৰম হাঁসি
কতো দামদিয়া বিক্ৰী কৰ্‌লি তুই
কতো দামদিয়া ।

অন্ধ্ৰত ভূমিহীন কিৰ্ষকে আত্মহত্যা কৰে
মহাজনী সুদত
ভোকত মাগী হয়
দিল্লীৰ ৰেশমী
মোৰ গাঁওয়েৰ মণিমালা কবিতা
কাপুৰেৰ অভাবত
উত্তৰ-প্ৰদেশেৰ তিনবৈনীয়ে
গোলাত নেয়
ফাঁসিৰ দোৰী
বলৎকাৰ কৰা হয়—
বলৎকাৰ কৰা হয়
মোৰ দেশেৰ ৰাজুবৈনীমাইক
অথোচো টিভিৰ পর্দাত
ঝিল্‌কিয়া উঠে তোৰ
ক্লোজআপ হাঁসি
কাৰ নির্দেশত ঐশ্বর্য
কাৰ নির্দেশত
এতো সহজতে
কোয়া দিবাৰ পাইস তুই
'জো চাহে হো যায়ে কোকা-কোলা এনজয়'

তোৰ দেহাৰ
অংগয় অংগয়
আমেৰিকাৰ পেটেণ্ট
তুই বিক্ৰী কৰ্ছিস
দেহাৰ ভূগোল
বহুজাতিক কোম্পানীৰ বেডৰুমত তুই
অভিজাত মাগী
মোৰ দেশেৰ
আবাদেৰ পাথাৰত আমেৰিকাৰ ইন্দুৰ মেলিয়া দিস তুই
ঐজৈন্তে হয়তো তোৰ
সমাজ সেবাৰ নাম
এইড্‌ছ
ঐশ্বর্য, আমা ঘিণ্ণা কৰুং তোৰ সৌন্দর্যক
কেনে গোলাম হোয়া
চিল্লাবি তুই
'জো চাহে হো যায়ে
কোকা-কোলা এনজয়'
ঐশ্বর্য, আকৰাত্তি
কাটেয়া যাইসতো তুই বাঁহজনী অথবা চৰাইপুঙত
বানাৰ সমায়ত মথাউৰিৰ আশ্ৰয় শিবিৰত
সৈন্দাভ্ৰমণত আসিস আকবাৰ
গোসাঁইগাঁও অথবা কঁচুগাঁৱত
ঢকুআখানা অথবা ধেমাজিৰ কির্ষক আকজনেৰ বাড়ীত আকসাঁজ খায়া যাইস
তাৰ পৰে শুনিম
তুই কেমনকৰিয়া কৈস
'জো চাহে হো যায়ে কোকা-কোলা এনজয়'

পত্থম বিশ্বৰ মোজেইক মজিয়াত
তোক নাচিবাৰ দিলেয় নাচিবাৰ লাইগ্‌বো 'নিমুৰা নিমুৰা'
ঢালিয়া দিবাৰ লাইগ্‌বো উমাক
গেলাস ভৰেয়া হুইস্কী
তুই খাওয়াৰ কথা কৈস
কোকা-কোলা
অথোচো তুই নাজানিস
কেমনকৰিয়া পানী পানী বুলিয়া
বেদুইন হয় ৰাজস্থানেৰ অবোধ বাচ্ছা

এৰ্ পৰেও পাবিনা
পাবিনা তুই কোবাৰ
ৰাজুবৈনীমাই ৰেশমী মণিমালাগুলানেৰ চোঁখত চোঁখ থোয়া
'জো চাহে হো যায়ে কোকা-কোলা এনজয়' ।
------------------------

মূল : হিমাংশু প্ৰসাদ দাস
ফোন - 9707015496

কামতাপুৰী ৰাওবদল :
কন্দর্পজিৎ কল্লোল